لازم بيوم النصر إحضر وهنّي
برغم الهم والغم والحسرة
أنا من يوم ما ربّ الكون كونّي
جعل تكويني بهالدني ثورة
غرف من كل اطياف الناس وجبلني
جعلني للمحبة ينبوع ومجرى
من جناين جنّتو زهرة قطفني
زرعني عالارض وبإيدو سقا الزهرة
يا ولادي أنا منّي لا شيعي ولا سنّي
القرآن كتاب واحد منّو بنهل وبِقرا
ولنّي درزي ولا مسيحي مع اني
بالتوحيد برتوي وبتبارك بإمنا العدرا
روعتي ان الخالق لكل دين جعلني
يخفق بقلبي جوّا وما يخفق لبرّا
يا ولادي بقلبي غصّة وبصدري عنّي
وعا هالحال صار الي فترة
يا ولادي بيكفي عا بعضكم ظلم وتجنّي
بيكفي تزيدو النار وتأجّجوا الجمرة
يا ولادي الـْ كنتو بإيد تحوشو العدو عنّي
وبإيد تزرعوا ترابي حياة ونضرة
كيف هيْك اختلفتوا صرتوا بعاد منّي
وبإيدكم عم تحرقوا ارضي الخضرا
ما تفكروا انو ضرب العدا بيإلمني
بيإلمني قتالكم منّو الوجع وبكترة
ارجعوا حبّوا بعض حتى النصر يحضنّي
ونفرح انتو وأنا ونحيا بهالنصرة
سامي الشرقاوي
ليست هناك تعليقات:
إرسال تعليق