يا عيون إمِّك

يا امّي تعي تا خبّْرك شو صار	قصّة بمغزاها بيتغنّو
عن شبّ ما شفتو بحياتي نهار	مهضوم من سنّ البدر سنّو
صِدفي التقينا عا الدرب مشوار	سلّم عليّ وابتسم سنّو
وشال وعطاني صورتو تذكار	قلبي هتف وقبلتها منّو
وقلّي شفت بحياتي صبايا كتار	كانوا عا لفتة عطف يتمنّو
يابا شو السر عقلي بهواكي طار	واهل الهوى مش سهل لو جنّو
حسّيت جسمي صار شعلة نار	ونبضات قلبي من همستو عنّو
وشفت الدني بوشّو شمس نوار	الله عاملوا لوحة من لَوْحات فنّو
لفّت إمّْها راسها وربِتطّوا بزنار	وكأنّو الماضي رجع عندها كأنّو
نزلت دموعها عا خدودها مدرار	وشهقت لمّا سَنّ وجع قلبها مسنّو
غمرت بنتها عا صدر من جلنار	آهاتها تبكّي الحجر لو عالبشر حنّو
وقالتلها يا امّي هيدا الهوى غدّار	يا عيون إمّك كرمال الله ابعدي عنّو