معتّر وبريمو منشال

بعد اللّت وقيل وقال	وشوفة حال وماشي الحال
ولو كفّينا عا هالمنوال	رح نهفا ونشيل سلال
حالتنا ما إلها مَثيل	لا تشكيلي يا بوخليل
بِعلْمي بدْنا الزير نشيل	تاري الزير ما بينشال
من برّا كلهن إخوان	ومن جوّا أشكال ألوان
ويلّي منّو بالحسبان	يضيع المال والرسمال
لا تضرب كفْ بكفْ	هيئتنا صرنا عا الرف
ويلّي كان ساقط بالصف	توزّر عا إسم الأجيال
خلصنا من عهد الدس	علقنا بهندسة اللّس
يلّي بيحكي قلّو هُسْ	ويلّي بيشكي رح ينطال
خناق دعيبس منتورة	كلّن قلبو الشفتورة
ويلّي فَخَتْ الشختورة	رح يغرق ما في مجال
قلمو جرّ بقلب الدفتر	زادا سخام مش أكتر
راحت عا شعب معتّر	محروق بريمو منشال
خف الجمرك شدّ السوق	زادولك رسم الصندوق
ويلّي شروالوا مخزوق	بعدو عا نفس الموّال
ما عدنا نحكم عا الميْ	ولا عا الشمس ولا عا الفيْ
مندقّ الميّْ وهيّ ميْ	رمّاني ملياني حمال
مش ماشي الاّ الدفع	يا زطّ سلّم عا البلْع
ويلّي ماشي بعدو رفْعْ	بدّو يِعلَق بالغِرْبال
عنتر ماشي بِيتمَخْطر	مْصدَّق حالو وِمْسوَغَر
بعزّ الازمة بيتْفَنْكَر	باعونا بكلمة كرمال
والحالي بعدا عرجا	تا نجلّس منّا خرجا
اخصْ عليكي يا عوجا	أصلِك مِن أوِّلتو مال
عَزايِم راحة وبسكوت	والعالم لايب عالقوت
يلّي بِيضْهر ما بيفوت	ويلّي جوّا شْكال شْكال
عطيْتَك صوتي وينَك	في هوِّي بيني وبينك
بتقْشِعني مش بـِ عينك	عا بابك في قفل وغال
دِرْتْ الديْنة لـَ ثرثار	بيرَشرِش عا جرحي نار
نطْ من العتبي للدار	الريّس قلاّب الأحوال
زِلْزال وما بِيسوا يدوم	لسْ بد يهبّ المظلوم
يوعى من نومو ويقوم	يحرق ديك السنسفيل
ويحيي بالصدر الآمال سامي الشرقاوي