مين المسؤول

يا ارض اشتدّي ما حدا قدّي ومين بيهدّي	قدّام المسؤول
ضارب بالارض فارش بالعَرض عم يفرض فرض	كل الْحْلول
بيفوت معرّم بيعود مكرّم ويللي تورّم	زلْمي مهبول
حاول يحكي حاول يشكي فضّ الشركي	كشَف المفعول
قال الحكومي مش مفهومي ولا مهضومي	ولا وشّا قبول
وبتاني ميلي خيْلي بخيْلي بإيدهن كيْلي	بيرشّوا فيول
ورجال الدين هوْدي مهمّين قولوا آمين	سَيفهم مسلول
وصحاب الشان سرقوا الشِنتان ومش بالحسبان	هالقوْل نقول
وقوْل المختار عندك تجار اكبر فجّار	علّة ومعْلول
مدارس رصّوا دمّك مصّوا ما بيغصّو	بلْعونا فصول
وِلـْ كان بباريس جايي لقّيس يلعب برجيس	ياكل معمول
وهيي هيّ حالي مزريي جيبي مهفيي	ما فيها سيول
نواب هلّو عا المجلس حلّو لكن كلّو	من دِهْنو مَسْقول
لا بينشّو ولا بيتشّوا ولا بيهشّوا	ولا بيْرعوا خيول
من برّا رخام ومن جوّا سخام ويلّي بينْلام	قاضي معزول
ما بينطال شو ما قال ساكن عرزال	محمّل محمول
وإنتْ يا خيْ خلّيك بالحَيْ عمْ تِشرب ميْ	وبتاكل فول
لا بتعنّ وبتشكي لا بتحكي ولا بتبكي	لابس مريول
روح من هون تعا من هون قعود هون	مأدّب خجول
لا بتتامبر لا بتتشنتر بذلّك راضي يا معتر	متل المسطول
ويللي محرقصني وصار مجنّني ورح بيموّتني	القول المعسول
جاييكم مال ووحدة حال ومش عالبال	تجرفنا وحول
اوعا تجن وتتكدّر شعب معتّر بكلمي تخدّر سامي الشرقاوي	نايم عا طول