يا ماما

يا ماما رحتي وعليّ طوّلتي الغيابْ              

خيوط عمري على فراقـك عم بيولعوا

ما عاد لي صبر، الصبر عنّي تابْ              

تا شوفك بقطّع خيوط الـْ بعد ما تقطّعوا

حنيني إلِكْ نَزعْ من عقلي الصوابْ              

وكاسات روحي من العطش رح يفقعـوا

بيطلع صباح النور بعيوني ضبابْ              

وغير وجهِك ما عـادوا عيونـي يقشعوا

يا ماما رضاكِ عنّي ما بعمرو خاب              

بعدْها ايدِك تكفْكِفْ عيوني .. لمّن يدمعوا

يا ماما يا ست الطهر يا بلسم للعذاب             

بعدْ مِنِّك حبّاتْ المسبحة فرفطوا وتوزّعوا

يا ماما من السما دخيلِك بعتيلي جواب           

تا شمّو وضمّو، بوسو وفوق راسي ارفعو

يا ماما يا كِلمي يا نَسمي يا عطر خلاّب         

خيرات الدني كلّها عند بابِك.... تموضعوا

يا ماما يا دعا الصالحين بوقْت الصْعاب         

انتي مش بس مِدرار الحنان. انتي منبـعو

يا ماما أنا مع ها الدني عم بقفّل حساب          

قرّب ركْب السما يجي ولعندك يطلّعني معو

سامي الشرقاوي