رح حلّفكْ يا وردْ

رحْ حلّفكْ بالعطرْ يا وردْ
باللوْن بالحِرقة برقّة الوَرقة

بالنِسمي بالبَسمي بالشهدْ

الْ منّك سارقو النحل سرقة

بخدودها الْمقمَّرة الْ كلْ خدْ
فالِق لوَحْدو من الحِسنْ فَلقة

بخصِرْها المِحتَدْ بصدرها بالنهدْ
بجيدها الناعم المصبوب المنقّى

باللمسي بكفّها بإيِدها بالقَدْ
بعيونها يللّي عليْكْ مشتِلقَة

بسِحرْ نظرةْ ما نوَضعْلو حدْ
بلحظْها الجارِف قلوب محتِرقة

بجِفنها برمِشها الممْدودْ مدْ
بتِمّْها الْ من الكوْثر مسقّى

بشفافها الْ ما خُلِقْ متلُنْ بعدْ
شِفّي حدّ الشمس مارقَة مرْقة

وشِفّي سارقة الطيِب منِ الرَندْ
بطعم العسل واللَّوْز المفقّا

بجمالها المسكوب الْ عن جدْ
كرْمالو ربْنا خالقِ الشَهقة

بشو بحلّفكْ بعدْ يا وردْ
يا رفيقها .. يا زيِنة الرفقة

لا تغارْ منها انتو الهنا والسعدْ
مع دّقات قلبي بتعمْلو جوْقة

انتَ الشوْق للحبْ والوعدْ
ولهْفةِ النطْرة وفرحةِ المَلقى

خلّيك عطُرْها الْ بيشدْني شدْ
ويهديني عليها بعتْمِةِ الفرقة

لأنها رَجِوْتي كلْ ما الحنين اشتدْ
ورِزِقْتي مِن لمّا ربّنا وزّعِ الرِزْقة

سامي الشرقاوي

اللوحة من أعمال Brenda Burke