على مهل يا عمري

ليش يا عمُرْ مستعجِل وطايرْ
تروّى روقْ وسوقْ عا مهلْ

عا قدْ ما كِنتْ مكتئِبْ وفايرْ
اليوم حابِبْ فيكْ إغزُلْ غزْلْ

حَبيبْةِ القلبْ قلبِتْ المصايِرْ

وصِرتْ بدّي إنهَلْ نبوعَكْ نَهلْ

كانِتْ حياتي ناشفي وقلبْ غايرْ
ومعها حياتي طابِتْ مِتِلْ شهد النْحلْ

يا عمري اللي معَكْ لافِفْ ودايرْ
ما لْمَحْتكْ الاّ من عيونْها الشِهلْ

يا ريت يهدا الوقتْ وتطلْ البشايرْ
وكل يوَمْ معها يمشي ببْطءِ النملْ

وكل ما يطلْ الليْلْ وتُضوي المنايرْ
ينعاد الصبُحْ ونحنا معو نرهُل رهِلْ

ونضلّْ هيك انتَ عمُر مِستَغْرِب وحايرْ
ونحنا بعد ما ضعنا عدنا والتَمّ الشملْ

ويا شمس حياتي اخترقي عتم الستايرْ
دفّيني وخلّي نورك فيني ... ينغُلْ نغلْ

سامي الشرقاوي

اللوحة من اعمال
Christiane Vleugels