مبروك يا مصر

بعد ما حاولوا الثورة يخمدوا

خلص الكلام ومصر ولدت من جديدْ

يا شعب مصر قلتو لأْ للي عاوزين يتشدّدوا

وقلتو لأ للي عاوزينكم تبقوا عبيدْ

وقلتوا لأْ للّي بمواقفْهم اتردّدوا

وقلتوا لأْ يا كلمة حقْ لازم نقولها ونعيدْ

شايف يا مصر وسامع ولادِك بقلبِكْ بيردّدوا

احنا الشعب ومين يقدر علينا في حبّك يزيدْ

اخوة بالميول اتفرّدوا لكن بالملمّة اتوحّدوا

رجعو صحبة يواجهو الاعادي بقوة من حديدْ

يا ريّس في مصر نص خايف انّك تتقصّدوا

ولازم تكون عارف ازاي تمحي خُوفُه وتبيدْ

يا ريّس مصر دايما مَقصد للي بيتقصّدوا

الخير والمحبة والعلم والسلم والرأي السديدْ

ومصر نعمة للّي بيسالمو ونقمة عـ اللّي بيهددوا

وعمرها ما كانت الاّ أمّة لامّة مش لقمة للّي يريدْ

خدها منّي كلمة خلّي هواك شعبك ولمصر تودّدوا

وما تخلّيش هوى نفسك يكون فرقة وتبديدْ

دي الفتنة اهلها نايمين وعالناصية بيتمدِّدوا

في مصر وكلّ الامّة عاوزين يولّعو نار تقيدْ

وقدرَك يا ريّس بيدّك تخلّي نيرانهم يهمِدوا

وبيدَّك تخلّي النار تشعلِلْ بينّا

وبيدّك تبدّل النار جنّة

وبيدّك تحضن شعبك ومصر بإيدْ

وتدافع عن كلّ الامّة بتاني إيدْ

 سامي الشرقاوي