بيروت يا مدينة بتربط قلوب
يا بيت واحد وحيّ كبير معجوق
حتى بعزْ أزمتك ووضعك المنكوب
بتبقي زنْبقة وبلسم لـَ قلب محروق
ومتل ما كنتي بعد كلّ غروب
ترجعي تحوّلي عتم الليل شروق
لا بدّ ما عطرك يطغى عـَ الحروب
وتسري نسايم زهرك بالعروق
وحيات كل مين تشرّد عـَ الدروب
وكسرِة خاطرك ودمّك المهروق
لِسْ بِدّ نهبّ متل قدر مكتوب
نحبس السارق ونرجّع المسروق
ونخلّي الدم بترابك المسلوب
يزهِر مدينة إلها الفرح مخلوق
تمتدّ مدّ عَـ قدّ قدّك المصبوب
بـِ بحر عشقان
مشقِة قدّك الـْ ممشوق
سامي
ليست هناك تعليقات:
إرسال تعليق