يا ضيعانك يا لبنان

 الـتالوت الْـ مِتْحكّم بـِ البلاد

الناهِب والتابِع 

ويلّي بالدم ايدو بلّ

والنضيف ... 

يا معتّر يا مات يا فلّ

والشعب الباقي يا شريك

محكوم ما معو متليك

ولا مازوت ولا خبز ولا قوت

وبلحظة 

تلات رباع الـْ بيوت بـْ بيروت

لا بلاط ولا حجارة فيهم ضلّ

يا ضيعانك يا لبنان

محكوم من ديب وسعدان

ومن زعران عقلهم مختلّ

سامي

هيك بيروت كانت .. وأكتر

 بيروت بيوت عالحب ربياني

ودروب فيها العشّاق تتمختر

من زمان بأمان الله عمراني

تغسل تعب نهارها وتسهر

الناس بتحمد ربّها .. شبعاني

الرزقة مع ولادها بتولد وتكبر

تـ احكي عن عزّها بيعجز لساني

بس هيك بيروت كانت .. وأكتر

ومن بعد ما بيروت غابت بثواني

وما ضلّ غير ديب وتعلب وعنتر

بكيت لَـ عميت واتشَقلَب كياني

مرمر لساني ونظر عيوني تعَوْكر

بسْ بالهمّة والعزيمة المنصاني

الأمل بقلوب الناس لِسْ بِد يعمَر

ومن قلب المستحيل نِسحَب الجاني

نكسّر نياب الدياب ونحبّس التعالب

ونحرّم العناتر 

علينا بعد اليوم تِتْعَنتَر

سامي

بيروت بقلبك خلّيني

 ‏بعيونِك عم شوف مْديني

سحر وبحر  واحلى بيوت

صبّيلي نظرة ... خلّيني

اسكر من خمرة بيروت

يا مْديني بقلبِك خلّيني

بين ضلوعِك بدّي موت

قومي يا عيوني شوفيني

حايص لايص بالشارع مزتوت

قومي انتفضي ضمّيني

عطيني من عزّك قوت

قومي ضوّيلي جبيني

خلّي الخير يعود يفوت

ومن عزمك عزم عطيني

لـَ اكسر ضهر الطاغوت

الـْ عم يسرق حقّك عـَ الهِيني

وطالع نازل حامل نبّوت

من وقت خلِقتْ علّمتيني

ما اسكت عـَ الظلم ورِدّ الحقّ

ولَوْ كان الحقّ بـِ بطن الحوت

سامي

بيروت يا مدينة قلوب

 بيروت يا مدينة بتربط قلوب

يا بيت واحد وحيّ كبير معجوق

حتى بعزْ أزمتك ووضعك المنكوب

بتبقي زنْبقة وبلسم لـَ قلب محروق

ومتل ما كنتي بعد كلّ غروب

ترجعي تحوّلي عتم الليل شروق

لا بدّ ما عطرك يطغى عـَ الحروب

وتسري نسايم زهرك بالعروق

وحيات كل مين تشرّد عـَ الدروب

وكسرِة خاطرك ودمّك المهروق

لِسْ بِدّ نهبّ متل قدر مكتوب

نحبس السارق ونرجّع المسروق

ونخلّي الدم بترابك المسلوب

يزهِر مدينة إلها الفرح مخلوق

تمتدّ مدّ عَـ قدّ قدّك المصبوب 

بـِ بحر عشقان 

مشقِة قدّك الـْ ممشوق

سامي

صرخو آخ ردّ الصدى

 الشعب عم يبحر بـِ بحور هَمْ

ومْواجْ غَمّ ما لِها مدى

وبعدك ماشي ورا تُجّار عَتْم ودَمْ

ومْضيَّع حياتَك وراهُم سُدى

حاجتَك تْناصِر الـْ فيك ما مهتّمْ

وتاركَك حايِص لايِص ما إلَك حدا

قوُمْ انْتفِضْ عـَ يلّي عمْ بـِ جرّعَك سَمْ

وبـْ يِدبحَك كل ما احتاج لـَ كبوش الفدى

وعلى يلّي كلّ ما شمْلِ الناس الْتَمْ

بيزرَع فِتَن وشرور يا محلا العدا

تـَ يصيرو الناس كل ما الألم عمْ

ومن الوجع صرخو آخ 

يردّ الصدى 

سامي

دولة ‏تفجير ‏بيروت

ما تقُولي اصلِك لوز

وانتي عوْجا يا عوْجا

عودِك مِحني ومهزوز

وتـ يجلّس منّو خرجا

دولة صابيع الموز

مشلولة منها عَرجا

دولة ناخرها العوز

اعتادت تستعطي وتترجّا

تَـ تِبقا ما بقا يجوز

بقّينا البحصة وحـ نبِجّا

دِبلِت ورقاتِك يا روز

ولا أمل منّك يُرجى

وشوكك عـَ عودك محجوز

من بعد ما العالم فَرجا

كيف خَلّا الـْ ما بيجوز يجوز

وفرقع بيروت بوِجّا

عبّا الدم بقلب الكوز

وكانو ماتو كلّ الناس

لولا ما الله نجّا

سامي