لفّيت كل الكون ورحابو
تـَ إهديها عـَ قد حبّي ومقدارو
لْقِيتْ عطُر زهر بيِنْسِقي ترابو
منِ السلْسبيل ومنِ الجِنان عَطّارو
وفستان بالنْجوم مطرّزي جنابو
ومن النور مشغول زنّارو
لكن لقيت الفجر فاتح بوابو
ومن جبينها عم يطلع نهارو
وعيون الزهر بِكْيو ودابو
تـَ من عطرها تتعطّر زرارو
قلت ياّ ملبٍّسي الزهر اجمل تيابو
ونورِك مزنّر الكون دايرْ مَدارو
ما لي غيرِك احسُب حسابو
وما بِملُك الّا حُبْ فايرَة بْحارو
بهديكي سنين عن حبِّك ما تابو
وبهديكي قلبي ونبضو وقرارو
تـَ تعيشي عُمرْين بالهنا طابو
عمْر بسِحر الفجر
وعمْر بالعُطر بتفوح أزهارو
سامي الشرقاوي
ليست هناك تعليقات:
إرسال تعليق