عا باب حارتنا

مبارح بعد ما حكينا
ولمّ الفجر قمر ليلتنا
تمنّيت الشمس تطوينا
تخلّينا وبقلبها تخلّي فرحتنا
وعا لحن موسيقى غنانينا
ترقص وتّرغل حساسين دنيتنا
واغمرك وتغمريني وما يكفّينا
الارض والسما حدود جنّتنا
والناس كل ما يناموا يحلموا فينا
وكل ما صحيو يحكوا بقصّتنا
انا البحّار ما إلي غيرك مينا
خديني وخلّيني
عا شطّك احكي حكايتنا
وابنيلك حارة بقلبي فيها الرب حامينا
واكتبلك عا بابها بـأوراق وردتنا
بحبّك يا تقبريني
حتى كل ما فتحتي الباب وغلقتي
يقروا اسامينا
انا شمّ عطرِك وانتي تشوفيني
قصيدة شِعر معلّقة
عا باب حارتنا

سامي الشرقاوي