سكران ومجنوني

وتقول قدّ ما فيك تسكر سكار

لأنّو كل ما كنت انتْ سكران

كل ما بكون فيك مجنوني

يا عطر الشوق

يا عطر الشوق نسّم بتحنان ومن جدولك صب حب للعشقان شفاف العشاق عطشانين وما اطيب شربة الميّ للعطشان

مسا الاشواق

يا عصفور الـ نايم قوم ترغل بـ مسا الاشواق بتحلا الترغلي خلينا سوا بعبّ الليل نغلغل ومنّو نسحب فجر يسكب نور عـ كل عاشق مِبتلي

خمر الشوق

يا نجوم الليل انزلو معي اسهرو ويا قمر السما قرّب سوا نسكر عيوني من خمر الشوق عم يسكرو القمر الـ ناطرو عن عيوني تأخّر

بعد ما الناس تفل

من بعد ما الناس تفل إبقي معي نكمّل السهرة وإن كان الفجر بدّو يطل منقلّو يا ريت ترجعلنا بكرة

بخاف عليكي

بخاف عليكي

من عيون الناس وظنوني وبخاف

من الهوا مطرح ما بتكوني وتـ بطّل خاف وإحمل همّ تعي تنقّلي عـ رموش عيوني

بيروت يا مدينتي الحزينة

بيروت يا مدينتي الحزينة يا أمَّ الحرفِ واللوْن لأنّكِ جوهرة الأمّة الثمينة يلتمّ عليكي قراصنة الكون

القمر داب

القمر داب والليل فلّ والشمس غلغلت فينا وعصفور عالشباك طلّ بدّو يترغل وخايف يصحّينا

لمّا بعيوني سكنتي

من لمّا بعيوني سكنتي زغلل بعيوني النظر بتطلع الشمس بشوفها انتي وبالليل بشوفك بدال القمر

شفافِك والورد

شفتِك قرّبتي شفافِك عـ الورد وكأنّي سمعتو قال آه بس شافِك وتِكي يمكن ناطرك تقولي بعد أو عم يجرّب يدوق طعمة شفافِك

قلبي شافها

قلبي شافها ... فَلت منّي وطار

لحقتو ... وعـ بيتها النبضات دلّوني وحتى بعد قلبي تكوي عيوني النار دقّيت عالباب دقّتيْن ... بعيوني

فَتْحت الباب ... ودخَلْت عالدار بكل حب ... عيونها حكيوني وعانْقِتني بـ ايدتين ناعمين صغار ما عرفت كيف قدرو يضمّوني

وخدودها متل الـ ورد بـ نوار من العطر غَرفْو تـ يعطروني وحاجبين .. خطوط عـ البيكار سيفيْن عـ الميليْن دبحوني

وشفتّين خمر بيسكرو الخمار

من نقطتّين اتنيْن بيسكروني وتقول قدّ ما فيك تسكر سكار لأنّو كل ما كنت انتْ سكران كل ما بكون فيك مجنوني

العتم علينا جار

يا ليل عتمك علينا جار صار لازم يطلعلك فجر شيل الغلّ وطفّي النار الـ صرلك شاعلها دهر بعدك كل ما طلع نهار بترمي جمرة فوق الجمر

مّا بعيوني سكنتي

من لمّا بعيوني سكنتي زغلل بعيوني النظر بتطلع الشمس بشوفها انتي وبالليل بشوفك بدال القمر

بيحلى السهر

بيحلى السهر اذا معي سهرتي وبيحلى الليل ان كان القمر انتي خيط الفجر بيسحب نور الصباح اذا كنتي شويّ عن الليل غفلتي

بعدتي عدتي

النسمي حاملي منّي عَنّي بعدتي ما عدتي سألتي عنّي بغيابك عالضنا ما حدا عانّي وقلبي ما رضي غيرك حباب

الترويقة

صباح الخير لعيونك الحلوين ولخدود مقمّرة وشفاف حرّيقة غمريني وفرفحي قلبي المسكين جوعان وبحب بـ تختي الترويقة

مواعيد الغرام

كنت كل ما بدي شوفها عصّب ما نام تلات ايام نتلاقى هيّ ميّتي خوفها وانا ملبّك غاصص بالكلام هيك كان للمحبة ظروفها وهيك كانت مواعيد الغرام

خوابي خمر

خوابي خمر بشرب دهر وبفضل صاحي ليليّي وبسكر عام اتنعشر شهر من طعم شفافا الخمريّة

فراق الغوالي

فراق الغوالي ما اصعبو بيفلّو ومن القلب ما بيذهبو تفليسة المال ما بتشغل البال بس تفليسة القلب كل الكيان بتكركبو

ضاع منّي الكلام

المسا ضاع منّي الكلام لمّا تمِّك عـ تمِّي هٙمّ وصارت شفافنا تنهنه غرام مٙرّة لمس ... مٙرّة ضمّ

يا ريْت

يا ريْت قبل ما فلّيْت خلّيْت قلبي عنْدها بالبيّت شو نفع دقّاتك يا قلب إن ما حدّْ قلبها دقّيْت

بتسكرني بشٙفّي

عيونا بتجرح وبتشفي بتدوّبني نتفي نتفي ما بسكر بقناني خمر شفافا بتسكرني بشٙفّي

خدود الورد

بمْسِك إيدا ومتل السحر بتحمرّ خدود الورد بقرّب بوس شفافا الزهر بتقّلي ... بيكفي هالقدّ زهْزٙه قلبي بشٙفّة خمر ومن خمرِك بدّي إسكر بعد

بعد العشا حلّي

رنّت وكنت سهران بالبيت صابب كاس رايق ومتجلّي قالتلي قلبي عليك .. اتعشّيت؟ قلتلها اتعشيت ...بس اذا بدّك طلّي حتى بعد العشا حلّي

بتخِطفي قلبي

بتخِطفي قلبي وبتفِلّي بتغيبي وبتِرجٙعي تطٙلّي غنّوجة .. بسْ قلبي انهدّ بطلّتِك ما بلحِّق دقّاتو عِدّ وبغيْبتِك دقّة ما بتخلّي

بشوفِك بالليل البدر

خلّينا مع بعض اليوم نسهر تـ نصبّح عالفجر ما بظُنّي بيجيني نوم وعم شوفِك بالليل البدر

نظرة ولمسة ايد

حابب تصفى بقى القلوب
ونرجع نعيش من جديد
لا طمع لا وجع لا حروب
والحب يادوب 
نظرة ولمسة ايد

هيك بيروت كانت .. وأكتر

‏كانت مْدينة ناس شبعاني
الرزقة مع ولادها تكبر
بيوت بأمان الله عمراني
وشوارع تغسل تعبها وتسهر
تـ احكي بيعجز لساني

بس هيك بيروت كانت .. وأكتر

نيرون و صهيون

نيرون أرسل رسالة لصهيون
خبرتي بالحرق بتصرّفك
ردّ روح لعاب يا مجنون
حرق مدينة ما بيشرّفك
تفضّل علّمك بالحرايق فنون
بتحرق بلاد وقلوب عباد
وغير عقول جاهلة ما بتكلّفك

سوا نعيش

فرّقونا تجار الموت والخراب
حرقو الوطن وسرقو الغٙلّي
يا ريت مع بعضنا نخلق الأسباب
نرجع بوطنّا أحباب
وسوا نعيش من اليوم تـ نولّي

جنّ كرمالها

سكون الليل وبُعدها بيتعبني بصب كاس وبحاكي خيالها يا ليل سكوتك معذّبني ويا بُعد خلّيتني اسكر وجنّ كرمالها

اسير العشق