أنا من يوم ما ربّ الكوْن كونّي
جعل تكويني بهالدني ثورة
غَرَف من كلّ اطيافِ الناس وجبَلني
جَعلني للمحبّي ينبوع ومجرى
ومن جناين جنّاتو زهرة قطفني
زرعني عالارض وبإيدو سقا الزهرة
أنا شيعي انا علوي أنا سنّي
القرآن كتاب واحد منّو بنهل وبِقرا
أنا درزي أنا مسيحي وربّي جعلني
بالتوحيد ارتوي واتبارك بإمنا العدرا
واليوْم بـ قلبي غصّة وبصدري عنّي
وعا هالحال صار اِلي فترة
يا ولادي بيكفي عا بعضكم ظلم وتجنّي
بيكفي تزيدو النار وتأجّجوا الجمرة
يا ولادي الـْ كنتو بإيد تحوشو العدو عنّي
وبإيد تزرعوا ترابي حياة ونضرة
كيف هيْك اختلفتوا صرتوا بعاد منّي
وبإيدكم عم تحرقوا ارضي الخضرا
لا تظنّوا انّو ضرب العدا بيإلمْني
بيإلمْني قتالكم لأنّو مِنّو الوجع وبكترة
ارجعوا لبعضكم وخلّوا صدوركم تحضنّي
وقلوبكم تخفق بأرضي وما تخفق لـ برّا
لا تظنّوا انّو تنولوا بالآخرة الجَنّي
إن زعّلتوني حِرْمتْ عليكم بالمرّة
سامي الشرقاوي
